CroALa, 2024-04-28+02:00. Nodus 1446444 in collectione croala.
Functio nominatur: /node/croala/1446444.
X.
Illyr. Scto macka kotj, sve misce lovj.Quidquid felis parturit, mures capit.
Felis, et Mus.
Apud se habere nobiles, ut plurimum, Solent catellos delicatos foeminae: In fele at una, qui nivem pilo praeit, Suos amores cum puella poneret, Dapibus opiparis nutriebat, sedula Cura adlaborans, ne videret uspiam, Quos illa abhorret, murium immundum genus, Alvumque faedis conspurcaret ne cibis. Quinos per annos id puella caverat, Pretium sed operae sit referre caetera. Haec ut natalem laetius ageret suum, Vocare amicas voluit ad coenam duas. Dum lauta mensis apponuntur fercula, Et diligentis opera laudatur coqui, Escarum odore mus allectus e via Per scalas tacito sese in triclinium gradu Tulit: hera feli porrigebat interim Nunc has, modo illas divite e mensa dapes. Edebat ille; at muris ut primum fuit Objecta facies, nil alios curans cibos Insano in illum provolavit impetu Condens capacis albi in obscuro specu. Mores parentum sortiuntur filii, Et quisque naturae sequitur habitum suae.