CroALa, 2024-04-29+02:00. Nodus 1444383 in collectione croala.
Functio nominatur: /node/croala/1444383.
IV.
Illyr. Scednabihte priko vodde priveo.Te sitibundum sicco ore per aquam traducerem.
Nundinatores duo.
Facile opprimetur nimia simplicitas dolis. Quicumque primi ad nundinas cum mercibus Veniunt, easdem carius quam caeteri, Qui tardiores appulere, distrahunt. Duo ergo ad illas dum feruntur mercibus Eisdem onusti se viae ad divortia Junxere; ad unam cumque metam tenderet Uterque, pariter ambulabant, invicem Confabulantes: sed praeire mercium Quod causa avebat alteri, ne copia Sint viliores, cogitabat callidus, Siquam inveniret, qua retardet eum, viam. Haec dum revolvit, de siti hic rabida queri, Et inquieta ferre circum lumina, Aquae si alicubi forte venam cerneret. Dum provehuntur, ecce in imis vallibus Lenis fluebat ponte subter ligneo Rivulus: hic inhians avolavit ocyus, Sitim misellus igneam ut restingueret. Post hunc at alter clamitat: quaeso, cave Bibas ab illo fonte, ni vitae piget. Prope heic geruntur bella: quis scit, hostium Haec ne veneno quis fluenta infecerit? Adhuc fer ergo paululum: en jam villula In colle se aperit: scande, te dulci mero Refrigerabit hospes; hinc ad nundinas Venies alacrior. Ille dictis talibus Persuasus ore praeterivit arido, Jugumque montis asperum superans bibit Merum in taberna, dum suas hic interim, Nam solus, merces distrahebat plurimi.