CroALa, 2024-04-29+02:00. Nodus 1433056 in collectione croala.
Functio nominatur: /node/croala/1433056.
IV.
Illyr. Kogn ſcedan mutne vode ne-ghleda.Equus sitiens aquam coenosam non fastidit.
Equus, et Onager.Siti per aestum maceratus aspera Equus inquieto vestigabat lumine, Si forte laticis quid videret uspiam. Hunc illi, anhelus multum obivit ut prius Telluris, altis devolutus rupibus Torrens abunde praebuit: inhians ferus Accurit avidis inde sorbens faucibus, Luto licet aqua mixta multo defluat. Onager, eodem forte qui stabat loco, Tolerans, nitidior dum fieret humor, sitim, Mirari, ab illo cum videret ebibi Multum coenosi gurgitis; tum sic monet: Cur hanc bibisti turbulentam? Paululum Adhuc morari si libuerat heic tibi, Vitro fuisset hausta pellucentior. Tunc equus: ut inquis, sic futurum existimo; Siti sed ipse cum aestuo; sperno quaerere, Qualis sit unda, pura, necne: vos eam, Quod estis adeo delicatis sensibus, Contra atque praesens exigit necessitas, Ut hauriatis expectate limpidam. Omnis famelico esca jucundissima.