CroALa, 2024-04-28+02:00. Nodus 1420054 in collectione croala.
Functio nominatur: /node/croala/1420054.
V.
Illyr. Upalamuje sjekira u med.Illius bipennis in mel incidit.
Rusticus mel reperiens.
Primo per aestum coeperat diluculo Annosi nemoris arbores bipennibus Duris agrestum multitudo caedere: Labore membra desudabant improbo Anhelitusque corda pulsabat gravis. Illuc Menalcas longiori proditus Somno appropinquans serior, se quercui Caedendae accinxit, quam consulto legerat, Certus mediocri quod labore sterneret. Quidni? Vetustas arborem corruperat, Truncusque adesus parte hiabat plurima. Jam quassa quecus nutat alto vertice, Soloque caderet, dextra si valentior Inferret ictus. Casus at heic accidit Repente quidam prorsus admirabilis. Nam dum bipenni stipitem introrsum ferit, Liquente pastor melle traxit illitam, Apis quod illo sedula stipabat loco. Domum advolavit, amphoramque deferens Dulces in illam mellis expressit favos, Nil jam de quercu succidenda cogitans. Quandoque caeca Fors boni plus obtulit Iis, qui merentur, opera si expendas, minus.