CroALa & LatTy: nodus

CroALa, 2024-04-29+02:00. Nodus 1405926 in collectione croala.

Functio nominatur: /node/croala/1405926.

Nodus 1405926 in documento ian-pan-epigr-eleg.xml

454. FRATRI TIMOTHEO SALUTEM Tardavere meae nimium, Timothee, tabellae; Polliciti dudum praeteriere dies. Aequa tamen causa est, quae me tardere coegit. Da veniam iuste, preco verende, more. Non lethea meam tenuere oblivia mentem: Curarum magna mole gravatus eram, Et peragendarum torquebar pondere rerum. Haec nobis tante causa fuere more. Quantum laudata sese exerceret in arte, simplex officium turba sequuta suum, Quae sacras leges divinaque verba docendo Instruit humanum religione genus, Pandere iussus eram. Rerum taceamne loquarne: Non facit ingenio sarcina tanta meo. Exigis, ut monstrem, cum sim rudis aequoris undae, Navita velivolam qua regat arte ratem; Ut doceam valere duces, et arare colonos, Cum sim terrarum militiaeque rudis.