CroALa, 2024-04-29+02:00. Nodus 1357724 in collectione croala.
Functio nominatur: /node/croala/1357724.
De navi Petri.Hic est ille senex, olim cui retia curae. Haec ratis, hi comites, hic erat ille lacus. At mala tempestas, et turbidus ingruit auster Et fragor in toto est, mortis et umbra freto. Pone metum Bariona tibi res magna peracta est. Nam salvi comites, salva carina tua est. Ecce super fluctus volitat rex aetheris alti, Ecce venit, cessas obvius ire Deo? Agnovere undae regem. iam tristia cedunt Nubila, iam zephyri mollior aura subit. Iam ratis aequatis pacata per aequora ventis Labitur, et certo sidere findit iter. Quaeque lacus prius, et tenues innaverat undas, Iam maris audaces traiicit illa vias.