CroALa, 2024-04-29+02:00. Nodus 1352996 in collectione croala.
Functio nominatur: /node/croala/1352996.
Cum face misisti puerum Roberte precatus, Ut veniam ad caenam, quae tibi recta domi est. Non veniam quare, rogitas? quia militis Auli Audire insulsas non libet historias. Nam medium rebus sese plerumque gerendis Ingerit, et pugnas, et sua bella sonat. Narrat et ut Medices laevum crus concidit ictus. Dum ducis ad dextrum militat ille latus. Praeterea quo quisque loco rem gesserit aeque Iactat, et ante alios impiger arma movet. Mox bibit, et vino montes, et flumina pingit, Et quae prona via est, aspera quaeque situ. Omnia vera quidem, sed dum conviva recumbo, Adde merum, et pacem rebus inesse sine.