CroALa & LatTy: nodus

Nodus 1351461 in documento didacus-p-cato.xml

De Nicolao modestissimo adolescente primam missam celebrante Divi Blasii aede. Floribus ornantur postes, ornantur et arae. Christe fave. Nicon in tua templa venit. Castus et ut iuvenis castos tibi devovet annos, Turaque dat flammis, et nova sacra parat. Iam lavat, et palmas tendens de more precatur, Fallor? An est solito maior in ore sonus? Aequa petit. fessis ut sit pax aurea terris. Blasius et longum regnet in urbe sua. Et si quid dirum, si quid crudele minantur Sidera, ab Illyria sit procul illa lues. Virgine nate Dea, si nos, et nostra benigne Respicis, et cordis stat pia turba tuo. Nunc iuvenem servare velis. Servatur in illo, Quidquid id est, in quo ducimus esse bonum.