CroALa & LatTy: nodus

Nodus 1219512 in documento andreis-f-carmina-vd.xml

Millos Pariseuich pugnat ex prouocatione cum Bachota Turco, Tranquillus Dum spectant armatae acies insigne duellum, Quo fuit haud ullum toto praestantius aeuo, Noster ab Helisiis et Bachota Turcus ab Orco, Inuictis iuuenes animis, duo fulmina Martis, Concurrunt saeuisque ruunt in uulnera telis, Orbatae ut tigres catulis, ut dira leones Quum rabies agitat caecosque ad praelia trudit. Tum Deus et uirtus nostro affuit: amputat hostis Ense genu; ille quidem secti Correxi ex recti pedis immemor omnes Instructus framea clypeoque uiriliter ictus Excipit et rara sese uirtute tuetur. In caput, ut tandem letali uulnere Millos Rem peragat, magnis attollens uiribus ensem Dirigit: is fixus clypeo irreuocabilis haesit. Sic tamen ipse trucem nimisque dolore furentem Spirantemque minas succiso poplite non est Ausus adire uirum bellacem cominus, atqui Grandine permulta saxorum perdidit hostem. Tum partis demum spoliis uirtute superbis, Exultans magnis nostrorum plausibus heros Accipitur decorisque sui nunc fama refulget.