CroALa & LatTy: nodus

Nodus 1141467 in documento marul-mar-repert.xml

IOANNES

Obedientia. Meus cibus est, ut faciam uoluntatem eius qui misit me, ut perficiam opus eius IIII. Venit hora, et nunc est quando mortui audient uocem Filii Dei. Et qui audierint, uiuent. Non quęro uoluntatem meam, sed uoluntatem eius qui misit me, Patris V. Quia descendi de cęlo, non ut faciam uoluntatem meam, sed uoluntatem eius qui misit me VI. Si uos manseritis in sermone meo, uere discipuli mei eritis, et cognoscetis ueritatem, et ueritas liberabit uos. Qui seruat Dei mandata, efficitur Dei filius, secundum illud: Si Deus pater uester esset, diligeretis utique me. Amen dico uobis: Siquis sermonem meum seruauerit, mortem non uidebit in ęternum VIII. Oues meę uocem meam audiunt, et ego cognosco eas etc. X. Si diligitis me, mandata mea seruate. Et ego rogabo Patrem etc. Qui habet mandata mea et seruat ea, ille est qui diligit me etc. XIIII. Si pręcepta seruaui et maneo in eius dilectione. Vos amici mei estis, si feceritis quę ego pręcipio uobis. Iam non dicam uos seruos etc.XV.

Oratio. Nunquam sic locutus est homo, ut hic loquitur VII.

Honor. Iesus, cum cognouisset, quia uenturi essent, ut raperent eum et facerent eum regem, fugit iterum in monte ipse solus, erudiens nos mundanas contemnere dignitates VI. Iesus de cruce matrem discipulo commendauit, instruens nos et inter aduersa honorare parentes XVIII.

Ocium. Ego sum uitis uera et Pater meus agricola est. Omnem palmitem in me non ferentem fructum tollet eum, et omnem qui fert fructum, purgabit eum, ut fructum plus afferat XV.

Hospitalitas. Domino discumbente in Bethania Martha ministrat. Non falmulabus imponit ministerium, sed ipsa met suscepit XII.

Obstinatus. XLVIII annos habens in infirmitate non habet hominem qui mittat eum in piscinam, ut sanetur. Assiduitas enim peccandi difficultatem peperit emendandi, sed dum sanari cupit, sanitatem a Deo accipit, et quod impossibile fuit hominibus, possibile fit Deo V.