CroALa & LatTy: nodus

Nodus 104105 in documento kunic-r-epigr.xml

61. Ad Sanctum Camillum de Lellis olim in Lycaeo Collegii Romani auditore Qui linguae heic, Leli, coepisti elementa Latinae Discere septenas natus Olympiadas; Nec puduit teneramque inter considere turbam, Jussaque cum pueris reddere pensa virum; Paullatim ingenuas excultus rite per artes, Humanum ut posses rite juvare genus: Tu face, ut haec, eadem celebrat quae septa Lycaei Trita tuo quondam tecta beata pede, Qualis eras, talis non abnuat esse juventus, Praebeat et se se morigeram et docilem, Litterulas vano laudis ne discat amore, Docta sed humano consulat ut generi.