CroALa & LatTy: documentum

Carmen salutatorium ad omnes coelestes Hierusalem cives et in memoriam diei ipsis dedicati, conscriptum. Andrea Casletano, Authore. Salve festa dies omni uenerabilis aeuo, Annua deuoto renouas quae gaudia mundo, Sanctorum coeli procerum, gentisque beatae Quae colit aeternas sedes stellantis Olympi. Vos etiam pariter coetus saluete piorum Foelices animae, quibus est in secula cuncta, Parta salus, nulloque aeuo peritura uoluptas. Tuque adeò ante omnes salue Sanctißima Virgo, Virgo atque alma parens, quae terras, astra, fretumque, Saluifico recreas partu: tibi militat omnis Coelicolum chorus, et condigno assurgit honore. Te castae matres, nuptae, innuptaeque puellae Concelebrant, tu stella maris, portusque salutis, Tu spes fida hominum, tu uitae porta perennis. Angelicae gentis salue ueneranda potestas, Innumeraeque acies, et quaecunque aethere in alto Militia est: uos cum furiis immanibus actus Lucifer, Arctoum pertenderet impius axem Scandere, et in septem solium transferre Triones, Fida manus Domino mansistis, et aethere toto Cum sociis pulsum coegistis ad ultima terrae Cedere, et inferni tristes habitare lacunas. Vos rerum ipse parens lectos ad iußa ministros Semper habet, uos illi aeterno aßistitis aeuo: Vos genus humanum magno dignamini amore, Illius curamque agitis, uos nostra Tonanti, Offertis uota atque preces: uos omnia contra Monstra Stygis, saeuosque Erebi defenditis hostes. Saluete Patriarcharum antiquißima proles, Quae nullo compulsa metu, non legibus ullis, Inter oues patrio tantum te more tenendo, Iustitiae obseruans ultrò, rectique, Deique, Duxisti innocuos, uitae sine crimine soles. Tuque Prophetarum salue uenerabilis ordo, Et pleni aethereo Diuini flamine uates. Vos quoque iustitiam, et magnas uentura per urbes Regibus intrepidè, populisque potentibus olim Dixistis; uos cum primi ob commissa Parentis Atria clausa forent nobis foelicia coeli, Nullaque maerentes afflaret gratia terras. Venturum melius seclum cecinistis, et annos, Cum pater aeternus, ueteris tandem immemor irae, Mitteret ex alto natum, qui carcere caeco Damnatum mortale genus, laethoque perenni, Morte sua eripiens reserato inferret Olympo. Concilii superum salue uenerande Senatus, Bis seni Haeroes, quos ordine legit ab omni Ipse Deus, uitaeque habuit testesque laborum. Vos uerum Christi cultum trans ultima claustra Oceani, trans Auroram, Boreamque niualem, Sparsistis: uos sacro impletis dogmate mundum, Et uasto quicquid complectitur aequore Neraeus. Vos quando suprema dies illuxerit orbi, Aduenietque Deus iudex, et Martia rauco Mugitu coelum quatiens tuba, cuncta repentè Humana eliciet patefactis ossa sepulchris, Tunc celsas suprà nubes residebitis ipsi Sublimes; omnes populi tunc uestra subibunt Arbitria, et totum magni censebitis orbem. Matryrio foelix salue preclara iuuentus, Et quicunque necem pro Christi nomini paßi. Vos caput innocuum, et uitam nil tale merentem, Vltrò obiecistis morti uirtutis amore. Non uos mille domant caedes, non dira furentum Verbera, non regum uultus: uos omnia forti Pectore uicistis; uos per discrimina mille, Vos per mille neces, gladios, flammasque rotasque, Suplicii, et quicquid Pluton Phlegetonte sub imo Impius exercet, coeli penetratis ad arces. Claustrorum saluete Patres, Monachique uerendi, Et quicunque piè uastas coluistis Heremos. Vos illustre genus, clarosque è regibus ortus, Vos agros, aedes, natos, dulcesque parentes Vltrò linquentes ad inhospita regna ferarum, Migrastis, capti regni coelestis amore. Non illic Tyrio saturatae murice uestes, Non ampla è Phario surgentia marmore saxa, Non regum luxus, et opimae copia mensae Cognita erant uobis: at parua sorte beatis Arcebant pluuias calamo contecta palustri Antra, et nocturnum praebebant saxa cubile, Pellebantque famem, collectae in montibus herbae. Saluete egregium coeli decus, et pia mundi Lumina, doctrina clari, uitaque probati: Scripturae uobis sacrae cognoscere fas est Magna mynisteria, et nostrae argumenta salutis. Vobis concedunt Musae sua munera fandi Ambrosiaeque fluunt, facundo è pectore rores. Vos contra Haereseon pestes, contraque luporum, Effrenem rabiem Christi tutamini ouile. Vos eius populis quae ducat semita coelo Virtutisque uiam, et magni praecepta Tonantis Panditis, et uero formatis pectora cultu. Virginei saluete chori, castaeque puellae. Vos dulces regum amplexus, thalamosque iugales Spreuistis: uos mortales exosae Hymineos Coelesti sponso, formamque animumque sacrastis. Nunc agnum choreas interque interque canentum Milia, quo se cunque refert commitamini euntem. Illi uirginea canitis dum cantica uoce, (Cantica quae rapidas ualeant mulcere procellas) Aptatis capiti uiolas, et florida serta, Quae non acris Hyems mordet, non Syrius urit, Ast ullo sine fine manent, sine fine uirescunt. Saluete aeternum pariter, saluete piorum, Innumeri populi, quos prima ab origine mundi, Elegit Deus, et coeli super astra uocauit. Non mihi si centum donet facundia linguas, Non si omnes Musae faueant, cunctosque recludant Parnaßi fontes, et largae flumina uocis, Vel minimam ualeam uestram percurrere laudem, Vsque adeò humanam fugiunt ea gaudia mentem, Maxima quae Dominus uobis sine finibus aeui Conceßit. Nunc quod superest dum uestra quotannis Orgia, et aeternos memores renouamus honores: Respicite ò tandem terras, miserasque querelas, Vt iam uera fides pietasque refrixerit omnis: Vndique relligio uariè concussa laboret: Vt ferus, et nostro nunquam satiabilis hostis Sanguine, Turcarun spirans immanè Tyrannus Ingruat, et captis intentet uincula collis. Illius aspectus tum nuper Pannonis ora, (Dum sibi fatali subiecit Marte Segettum) Horruit, et trepidis uagus Ister substitit undis. Nec satis est miseros altrici pellere terra, Iam fera bella mari feruent, furit aequore toto Mauors, et tectae latitant sub claßibus undae. Non tamen ille diu spoliis gauderet opimis Christiadum, nec enim sic illis uiuida uirtus Languet: sunt ualida, et rigidum spirantia Martem Pectora, quae ualeant sceleratam perdere Lunam, Sanctaque trans Tanaim, rapidi trans ostia Tygris Figere signa Crucis: uerum discordibus armis Inter se dum bella fouent, dumque omnia turbat Vulneribus faecunda suis, semperque renascens Haereseon pestis, crescit nostra ille ruina. Sic ueneranda fides cui seruiit Hesper, et Ortus Angusto contracta gyro, uix oßibus haeret. Vos quorum nunc festa pio renouamus honore, Syderei proceres populis succurrite uestris, Iratumque piis precibus placate Tonantem, Aspiciat tandem pacato numine terras Sit modus irarum, meritae sit denique paenae. Ipsa repubescat pietas: Discordia longè Exulet: et longae succedant saecula pacis. Finis.