CroALa: documentum

Documentum VITALE.pane-01.xml in db pdill0

---

in panaegyrim praefatio Sunt quos cornipedes, canes, auesque Delectat uolucres fouere, et illi Pingues montibus insequuntur altis Damas, hi cupidi sequuntur aurum. Secum, fulmineos equos, canesque Secum, secum habeant aues uolucres, Damas opposita sequantur hasta. Non talem cupido decorem, et illis Diues muneribus frui, rapit nam Fortuna hoc facili modo bonum, nec His parcunt celeres bonis sorores. Phoebus non trepido sequendus ore Sit dux, sit dominus mihi, sit auspex, Hoc fiant cineres mei decori Vnguento, et facilis sequendo sit hic. Ergo mellifluis ades camoenis, Et pandas graciles Apollo musas, Et pandas numeros Apollo dulces. panegyris reu. d. Mattheo Longo, episcopo Gurcensi, | Caesareae Maiestatis uicemgerenti excultissimo Caesareas iterum gentes, gratamque tonanti Progeniem, ramis condit tibi quercus opacis. O tandem gratare tuis generosa tropheis Roma iterum. uindex Heroa e stirpe Camillus, Ortus ab Hesperia pepulit fera praelia, qui nunc Magnanimo Liguris latitat sub pectore IVLI. Hostia septeni superas fluitantia Nili Albula, tu Gangem uincis, fluctusque Tymaui, Tu celerem Tygrim, rapidum Symoenta, et Araxis Impetum, et auratas qui fert Pactolus harenas, Victus honorato sequitur tua flumina riuo. Et maior titulis nunc aurea Roma superbis Efficitur, sublime caput super aethera tollens, Sub Iulo aeternos rursus uisura triumphos Gaudet, et auratae rutilant in fronte coronae, Qualis quum roseo compellat mane colore Aurora et curui gaudet liquisse mariti Pulchra thorum, dulces alio quaestura lepores: Talis perdomitis laetatur Roma tyrannis, Quae Rhodanum, quae Arabas olim disiecit, et Indos Sub iuga Caesarei totus se tradidit orbis Imperii, Cilices arisque deisque superbi, Ditia uictrici dederunt sua munera Romae. Ecce iterum Gallos eiecit Roma rebelles, Atque iterum Latia sub maiestate tenentur, Armigeros quondam quos perdomuere Quirites, En tibi Meonii bacchantes praeda resurgunt, Magnanima aduersos gestantia pectora Thyrsos, Quae rabie rigida furibunda mente trahuntur. Sed quis rumor adest, praeceps quo uulgus oberrat, Quo proceres Latii? cui pegmata celsa parantur? Obsitaque egregiae testantes regna tabellae? Chara Deum soboles et nostri cura Tonantis, Caesarei Imperii spes una et sola carinae Occurrit lassae, cuius uirtute procellas, Oceanus mulcet tempestatesque serenat, Cuspide Mars, Phoebus Cythara, Cyllenius ore. Alter olympiaco merito decoratus honore Emicat, et serpunt tres circum clara coronae Tempora; grandiloquos tutatur prima poetas, Altera magnanimis ducibus fauet, altera coelum Respicit, occultos monstrans super astra meatus, Relligionis opus, primasque acquirere sedes Edocet, et superas qua possis scandere ad arces, En meus ingreditur Latium dux maximus armis, Atque toga, hunc sequitur procerum concordia diues, Purpureique patres, et candida turba potentum. Auratis tortisque comis uenere Sycambri: Aethiopes nimio nigrantes sole sequuntur: Pannonii hinc alacres frenis, phalerisque decori Conspiciuntur equi, spumis maduere lupati. Tympana pars tundit, Buxos pars inflat inanes, Horrisonusque fragor uolitat per amica tubarum Sydera, Maeoniis fumat et plausibus aether. Talis Germanis uenit Gurcensis ab oris Caesaris auspicium, talesque sequuntur ouantes Hunc Latii proceres, uultu nitet altus eburno. Augusti imperii custos fidissime salue, Salue chara Deum proles, rectura per aequor Carbasa Clauigeri tandem, cui nomen utrunque Principis et Vatis merito memoranda dedere Facta, sub auspiciis cuius secura Poetae Credunt uela mari Zephyris adiuta secundis. Mens fugit Herois laudes scriptura decori, Et superat genus hoc semper fulgentius oestrum Scribentis, quantum ceu quum ditatur auarus Diuitiis, tantum fit pauper saepius auro. At tu seu Vatum fauor es, seu cura deorum, Seu Phoebum splendore refers, cytharaque sonanti, Non mortalis adest uultus, color ipse sed almum Purpurei radii testantur tempora circum. Denique ni Samiae fallamur dogmate rhetrae, Quae tua nunc anima est, fuerat iam Caesaris, artus Ingressa aethereos, et numina tanta decori Principis Italiae conseruatura quietem. Oceanum interea dum collapsura reuisunt Sidera, dumque cauis respondet montibus Eccho, Semper honos, nomenque tuum, laudesque manebunt, Namque tua gaudent sub tempestate Poetae Laurigeri, quorum est mortales rumpere nodos, Et freta secura turgentia rumpere classe. O facile ingenium priscos imitantis honores, O faciles animi generoso in principe, et ingens Progenies calamos sacri uictura Maronis, Prisca tamen patriae tutores secula iactant. Qui periere armis, et honoro Marte, Quirites At tu non armis, nec Martia templa reuisis Caedibus infandis miserorum aut morte triumphans; Sed praefers tantus sanctissima dona Mineruae, Cuius honorati fragrabant fronde triumphi, Haec haec magnanimo laus est in principe. Salue Candida pax, cuius licuit foedare decoram Vlli unquam faciem summoque cupita tonanti Quum superas uoluit coelorum scandere sedes, Et zonas uexare poli fera turba Gigantum, Te furor euictis manibus post terga, dolique, Et rabies furibunda manus connexa sequuntur; Denique fidus amor circum, Iusque omne fidesque, Et pietas graditur, post hos concordia ramis Palladiis ornata petit dextram atque capillos. Et tecum Italia qui maxima fata labante Egit adest, uenerare ducem, uenerare deorum Progeniem, qua nil dum lumina candida fundit Phoebus, ab Eois spectat iucundius oris. Et uos o Latii facunda caterua Poetae, Quos decet excelsum Musarum scandere montem, Et iuga Parnassi subter labentia opacis Flumina speluncis, riuosque haurire decoros. Hoc opus est uestris calamis et dignius altis, Ast ego (dum tenues seruabunt molliter auras Fata) tuos quacunque canam sub uoce Triumphos. Arma canant Vates alii, seu mollia molles Facta uiri Veneris tenerosque Cupidinis arcus. Tu mihi materies, numenque, decusque, canendi Aduenis, et nimias nostro de pectore curas Pellis, anhelanti requiemque imponis auenae.