CroALa, 2025-04-20+02:00. Nodus TABARINO.epig-01.xml in collectione pdill0.
Functio nominatur: /documentum/pdill0/TABARINO.epig-01.xml.
1. Diuino quantum Graeci laetantur Homero, Quantum Virgilio Romana potentia gaudet, Foelices Istri tantum Raphaele triumphant: Alter ab astraeo cecidit Meliboeus Olympo.
2. Ad te si tarde, pater Inderbacche, revertor, Da veniam quaeso: non mea culpa fuit. Hospes ille meus relegens a vertice summo Hoc semel et bis item terque revolvit opus. Obstipuit tanto confusus carmine lector: Miratur cytharae tam bona plectra meae, Meque inter claros audet numerare poetas Tempora quos olim prisca tulisse ferunt. Perplacuere sibi mea carmina, meque legendo Tractavit lota semper utraque manu: Conspice praetextam claustris ostroque nitentem Auratasque comas, nobile crinis opus: Aspice pectus item, princeps et eburnea membra: Non est in toto corpore menda mihi. Ergo me vultu, pater Inderbacche, sereno Excipe more tuo, meque benignus ama.