CroALa, 2025-04-20+02:00. Nodus STROZZI.epit-01.xml in collectione pdill0.
Functio nominatur: /documentum/pdill0/STROZZI.epit-01.xml.
1. Hoc iacet Estensis Nicolaus marmore, laetos Marchio tranquilla populos qui pace regebat. Consiliis opibusque potens princepsque benignus, Iustitiae nitor, insignis pietate, replevit Magnanimus totum factis ingentibus orbem. Italiae decus extinctum gemit anxia tellus, Sidera laetantur animam excepisse beatam. 2. Si quis iustitiae cultor pietatis et almae Pacis amans, comis magnanimusve fuit, Si quis et imperium placida dicione regebat Felix et sapiens, hic Nicolaus erat Estensis. Nomen terris cineresque reliquit Marchio, divinus spiritus astra tenet.
3. Splendida lux italis olim et spes inclita rebus Et pius ac sapiens pacis et auctor eram. Felici populis iustus fortique gubernans Sceptra manu, toto clarus in orbe fui. Munificus, clemens Nicolaus nominis alti Hoc iaceo estensis marchio sarcophago. Detinet ossa mei Ferraria pignus amoris Laetaque mens campos incolit elysios.
4. Parce graves lacrimas et acerbos fundere questus, Italia, ac tristis fata dolere mea. Frigida marmoreo recubant si membra sepulcro Et latiae gentis concidit altus honos, Reddidit at mea me virtus invicta beatum: Vivit in aetherea spiritus arce meus. Estensis placui Nicolaus marchio terris, Sed magno placui nunc magis ipse Deo.