CroALa, 2025-04-20+02:00. Nodus ROTA.nunc-01.xml in collectione pdill0.
Functio nominatur: /documentum/pdill0/ROTA.nunc-01.xml.
ad Vespasianum Gonzagam Navariae Proregem, | et Exercitus Imperatorem, Berardinus Rota
Dum populos GONZAGA regis, dum regna tueris, Haec armis, illos lance, manuque pari, Quos et Iberus aquis, cingit quos caute Pyrene, Quos et Cantabrici perluit unda freti: Magnis tot curis tantillum si datur oci Ad scripta ut suesti nostra legenda redi. Nec mirere novum, nam frater Martis Apollo est; Tu Dux, tu Vates inter utrunque nites.
Paulus Manutius ad Berardinum Rotam
Felix, cui licuit pleno bibere ore liquorem Pegaseum, et magnis vatibus ire ducem. Ingenium nomenque tuum, ROTA candide, et artes Fama coloratos ducet ad Aethiopas, Ducet et ad Morinos, Lelegas, pictosque Gelonos, Et qua Riphaeis nix iacet alta iugis, Et qua Sol radiis rutilum caput exerit, et qua Caeruleo labens conditur Oceano. Seraqua mors gelido cum clauserit ossa sepulcro, Non tua Lethaeis nomina merget aquis.
Dionysius Athanasius ad lectorem
In nova mutari quicunque haud corpora formas Posse putat, vatem perlegat ille Rotam: Inque ipsum inveniet mutatos quatuor unum, Tecum Flacco, Albi, te Valeri, atque Maro. Hisque duos addet: te dulcis nempe Terenti, Arbiter Etruscae teque Petrarca lyrae. O mirum et nulli credendum. Corpore in uno Illustres una vivere sex animas.