CroALa, 2024-05-15+02:00. Nodus ROLANDO.rhyt-01.xml in collectione pdill0.
Functio nominatur: /documentum/pdill0/ROLANDO.rhyt-01.xml.
Anni ducentesimi quinti et milleni Quadrageni tempore currunt isto pleni Quo Rex Regum intulit ictum in ameni Cornetani Populi coetum, et sereni Nam tuentes patriam fide Nazarei Et Iura Ecclesiae defendentes Dei Capti sunt insidiis Frederici Rei Quatrageni quatuor in luce Diei Qui est quintus Decimus in Septembris mense In exacto praelio plures cadunt ense Cappineto hinc et hinc sunt nimis offense Acies et machine trite sunt condense Ut ovis ad victimam ducti sunt ligati Innocentes nequiter bonis denudati Sistunt in cumpedibus ferreis catenati Atro nempe carcere steterunt dapnati Nequam Capitanens cuncta seriatim Retulit nequissimus, ac in scriptis statim Qui rescripsit propere mandans nominatim Cornetanos perimi furcis catervatim Et Vitalis pessimus illud Adversanus Nuntiat sententiam duram, et vesanus Furcis, ut perimeret gula, non per manus Nisi terram redderet cetus Cornetanus Ad hoc constantissimi fide respondentes Nos subire potius mortem non merentes Velle, quam ut populus Cornetanus dentes Sensiat rabdissimos, et crudeles gentes Pravus ille Nuntius orbis destructoris Frederici pessimi summi proditoris Scelus nefandissimum contulit doloris Dum in Christi filios dat causam meroris Posquam per hebdomadas septem nominatos Tenuit Cristicolas atque condamnatos Cornetanam patriam properans nudatos Eos secum praecipit, ducitque ligatos Intrante Novembrio die Sabbatorum Quarta constituit pena dapnatorum Incidunt ligantia filii pravorum Quibus furcas erigunt in nece Iustorum Secus Martam erigunt supra Maloferam Furcas sub Monterano dant vocem severam Alt Alt Alt captum Cornet et tunc sancti veram Precem dicunt Domino satis adque meram Christe Rex mirifice tibi commendamus Nos, et nostram patriam ut tecum vivamus Nam tuam iustitiam nunquam dubitamus Mori, o Rex Gloriae, ad te nunc migramus Censerat Vicarius Petrus Malaspina Neminem respicere illos in ruina Nam quae agunt impii fient repentina Et nos consolabitur gratia divina Et tunc vox nec strepitus fuit per Cornetum Orum patres, filii, fratres ad quietum Sunt, et nemo ausus vultu dare fletum Fidei constantia deponentes metum Tunc Vitalis rabie, ac furore plenus Precipit fidelium furcis mori genus Dei, qui sunt numero binus et terdenus Abeunt in Domino, Coetus sit serenus Quorum nota nomina est Octavianus Geptius, et Angelus, et Gerardus planus Petrus surdus alacer ac dura manus Quisque milex extitit probu sensu canus Angelus Raynerii, Magister Mactheus Magalottus, Angelus, et Bartholomeus Bernardinus, Iacobus, Petrus, et Mactheus Farulfus Notarius quem erexit Deus Et Rollandus Iacobi, Rollandus Certensis Iannes olim Stephani, Gilius ut ensis Benvenutus validus olim Montaltensis Et Petrus Letitie fidus Tuscanensis Pellegrinus Scambius et Bonaventura Ranutius, Gregorius cuius Dei cura Petrus Polli iuvenis cuius vita pura Quidam alter obiit vitam, cum secura Et Talentus providus, Petrus Faldubonus Iohannes Stanchalcerius fortis, recte bonus Iohannes Gualdaldrule cuius pius sonus Horum quisque pertulit inauditum honus Igitur, o populi quis iam non stupescit Quod Cornetum facinus tulit, et mutescit Quam ecclesiasticam fidem neque nescit Et spe regis gloriae ipsum non tabescit Post Vitalis reditum pariter suorum Quidam locum properant cito mortuorum Et caterva remanet sola sospensorum Et deponunt corpora subito sanctorum Festinanter deferunt corpora Cornetum Summa cum tristitia Populus ad fletum Motus est aequaliter neque dat quietum Sepulturam subeunt, et deponunt metum Terreant, o populi, ista quae auditis Dum tyranni rabiem per orbem sentitis Eidem resistite, qui est actor litis Liberi poteritis: esse si velitis Acta sunt haec omnia tempore beati Pape Innocentii quarti Christo dati Per quem gentes subdite dantur libertati Et Cornetum sudbitur Dei Magestati