CroALa, 2024-05-21+02:00. Nodus POLIZIAN.odae-03.xml in collectione pdill0.
Functio nominatur: /documentum/pdill0/POLIZIAN.odae-03.xml.
ad Horatium Flaccum
Vates threicio blandior Orpheo, Seu malis fidibus sistere lubricos Amnes, seu tremulo ducere pollice Ipsis cum latebris feras; Vates aeolii pectinis arbiter, Qui princeps latiam sollicitas chelyn, Nec segnis titulos addere noxiis Nigro carmine frontibus; Quis te a barbarica compede vindicat? Quis frontis nebulam dispulit, et situ Deterso levibus restituit choris Curata iuvenem cute? O quam nuper eras nubilus et malo Obductus senio! Quam nitidos ades Nunc vultus referens, docta fragrantibus Cinctus tempora floribus! Talem purpureis reddere solibus Laetum pube nova, post gelida nives, Serpentem, positis exuviis, solet Verni temperies poli. Talem te choreis reddidit et lyrae Landinus veterum laudibus aemulus, Qualis tu solitus Tibur ad uvidum Blandam tendere barbiton. Nunc te delitiis nunc decet et levi Lascivire ioco; nunc puerilibus Insertum thyasis aut fide garrula Inter ludere virgines.