CroALa, 2025-04-20+02:00. Nodus POLIZIAN.odae-01.xml in collectione pdill0.
Functio nominatur: /documentum/pdill0/POLIZIAN.odae-01.xml.
in laudem cardinalis Mantuani, | Baccii Ugolini nomine
O meos longum modulata lusus Quos amor primam docuit iuventam, Flecte nunc mecum numeros, novumque Dic, lyra, carmen: Non quod hirsutos agat huc leones; Sed quod et frontem domini serenet, Et levet curas, penitusque doctas Mulceat aures. Vindicat nostros sibi iure cantus Qui colit vates citharamque princeps; Ille cui sacro rutilus refulget Crine galerus; Ille cui flagrans triplici corona Cinget auratam diadema frontem. Fallor? An vati bonus haec canenti Dictat Apollo? Phoebe, quae dictas, rada fac, precamur: Dignus est nostrae dominus Thaliae, Cui celer versa fluat Hermus uni Aureus urna; Cui tuas mittat, Cytherea, conchas Conscius primi Phaetontis Indus; Ipsa cui dives properet beatum Copia cornu. Quippe non gazam pavidus repostam Servat, aeoeo similis draconi; Sed vigil famam secat, ac perenni Imminet aevo. Ipsa phoebeae vacat aula turbae, Dulcior blandis Heliconis umbris; Et vocans doctos patet ampla toto Ianua poste. Sic refert magnae titulis superbum Stemma Gonzagae recidia virtus, Gaudet et fastos superare avitos Aemulus haeres. Scilicet stirpem generosa succo Poma commendant, timidumque numquam Vulturem foeto Iovis acer ales Extudit ovo. Curre iam toto violentus amne, O sacris Minci celebrate Musis! Ecce Mecoenas tibi nunc Maroque Contingit uni. Iamque vicinas tibi subdat undas Vel Padus multo resonans olore, Quamlibet flentes animosus alnos Astraque iactet. Candidas ergo volucres notarat Mantuam condens tiberinus Ocnus, Nempe quem parcae docuit benignae Conscia mater.