CroALa: documentum

Documentum PETRARCA.epit-01.xml in db pdill0

---

1. epitaphium Manni Donati Miles eram magnus factis. et nomine Mannus Donatos quos fama uocat celebratque. uetusti Sanguinis auctores habui manus inclita bello Dexteritasque immensa fuit nec gratia clare Defuerat forme: dubiique peritia martis Dum pia iustitiae feruens amor induit arma Nil metuens: multis late uictritia campis Signa tuli: multos potui meruisse triumphos Florentina mihi generose stirpis origo Cara domus patauum: sedesque nouissima busti Contegit exiguo fessum sub marmore corpus Reddita mens celo: nomen seruate sequentes Italie externisque procul notissimus oris Ignotus patrie uixi: que forte sepultum Optabit reducem: fors quem contempsit amabit. 2. epitaphium Francisci de Brossano Vix mundi, novus hospes, iter, viteque volantis Attigeram tenero, limina dura, pede Franciscus genitor. genitrix francisca. secutus Hos, de fonte sacro, nomen idem tenui Infans formosus. solamen dulce parentum Nunc dolor. hoc uno, sors mea leta minus Cetera sum felix. et vere gaudia vite Nactus, et eterne. tam cito. tam facile Sol bis, luna qvater, flexum peragraverat orbem Obvia mors. fallor. obvia vita fuit Me, venetum, terris dedit urbs, rapuitque papia Nec queror. hinc celo restituendus eram 3. Tusca parente pio sed facta ligustica dulci Coniuge iam proles plurima clara fuit. Nulla magis seu fida viro seu subdita patri Seu magis externae nescia laetitiae. Nomen erat Francisca meum studium sed honestas Dos mea simplicitas et sine labe pudor. Me mea sors varie puerili vexit in aevo Hic immota quies hic mihi certa domus. Iam matrona quidem sed adhuc florentibus annis Eripior terrarum restituorque polo.