CroALa, 2025-04-20+02:00. Nodus MUZIO.carm-01.xml in collectione pdill0.
Functio nominatur: /documentum/pdill0/MUZIO.carm-01.xml.
Quisquis Pierios colit recessus Et sacros latices amat beatus Praecingens hedera caput sequaci Adsit, dum numeros canunt poetae; Adsit, dum numeris fauent Camenae, Dum sacri Hoelcelium canunt poetae. Doctus Pegasidum chorus sororum Terram ter pedibus quatit quaterque Saltans ad modulos, uicesque in orbe Alternant placidae modis iocosis. At Phoebus cithara sonat canora Gestans temporibus comas amicae, Laurum, perpetuas comas puellae. Plaudunt turba decens trium sororum Texuntque Hoelcelio suo coronam, Texunt ut decorent patrem piorum, Patremque et decus omnium bonorum. Qui prudens, facilis, bonus, benignus, Auctor propositi tenax honesti, Ultor propositi mali seuerus, Spernit diuitias colitque Musas, Uates uersiculosque amat fouetque. Hunc ergo, hunc merito canunt poetae, Adsint Aonides choris iocisque, Phoebus dulcisonum melos repulset, Innectant Charites rosasque serto Et serto Hoelcelio caput coronent. Iam non Hoelcelius peribit unquam, Non is Tartareas adibit umbras Aut sedes Stygias lacusue Auerni. Sed leti impatiens in omne tempus Uiuet carminibus legendus orbi: Qua caelo irradians diem recludit Sol, quaque Oceani lauatur unda; Et uiset Libyae, calentis arua Et duram glaciem poli rigentis. Tandem caelitibus deis uocatus Inuiset superam beatus aulam, Felix ter quater et quater beatus. Absit nenia flebilis sepulcro: Mordax inuidus hinc procul facessat; Adsint qui numeros canant poetae Et Musae Clariusque Gratiaeque.