CroALa: documentum

Documentum MUSSATO.carm-05.xml in db pdill0

---

Mussatus Tu qui nostra soles dubiis absolvere curis Pectora, venturi cui mens non inscia fati, Uranie dictante tua, da cernere quidnam Immineat nostrae, Tuscos si vicerit, urbi, Iste carens terra Carolus. Stat fabula coram Ignavo quid cessit equo post facta dolenti, Sessorem qui sponte tulit quo vinceret hostem: Vicit et occubuit pro libertate relicta. Quod si casus eat victis ut Tuscia Gallis Plus aequo exultet, caput et gens improba tollat Utrices meditata vices, timor imminet altus Ne cadat in nostros candens discessio cives. Lovatus Quae sors immineat patriae si Francia Tuscos Vicerit aut victis exultet Etruria Gallis, Consulis, eventus dubii servator Aselle. Certus in incerto non sum, prudentia menti Tanta meae non est: non me sic implet Apollo Divinusque tepor, sed, quod per tempora vidi, Forsitan occulti res est praesaga futuri. Vidi ego, cui placui, fuerat dum parvus, amicum In damnum crevisse meum: cum surgit in altum Fortunatus inops humilem contemnit amantem. Vidi ego, cum placidus retinet suus alveus amnes, Purpureos circum flores et gramine picto Luxuriare solum; tumeant si forte malignis Imbribus aut alios admittant flumina fontes, Sordet humus dilecta prius faciemque virentem Perdit et immani squallent sub gurgite ripae. Parva fuit tellus et Longa mitior Alba Quae nunc imperii caput est et legibus orbem Temperat. Alluvium timeo viresque potentum: Regis enim virtus flatu provecta secundo Est bona finitimis, ut Romulus ante Sabinis, Tullus ut Albano, Nano velut hospita Phocis. Rursus ut aspexi quid pristina pertulit aetas, Qua veterum culpa, quis cives cladibus olim Spiritus impegit, quorum reparata labore Libertas immota viget quantumque pericli Sit bene composito pulcram refricare quietem, Ascensu vereor Tusci ne gentis amicae Descensu nostram dissensibus inquinet urbem. Ergo ego cum Franci timeam, cum regna Suevi, Cum mea tam vario nutet mens anxia fluctu, Hinc Boreae furiis, hinc turbine territus Austri Sanius eligerem nulli dare carbasa vento, Si tamen alterutra labi nos parte necesse est.