CroALa: documentum

Documentum FORFICI.epit-01.xml in db pdill0

---

1. Caelestem repetens Nicolaus marchio sedem Orbatam merito tam clari lumine regis Concutit Italiam, cuius non itala tellus Nec pace similem similem nec viderat armis, Principibus latiis placido qui pectore tantum Munificisque animis tantum praefulsit in omnes, Cetera quantum inter praefulget Lucifer astra. Plorandum decus ille aevi memorabile nostri En iacet. Hic corpus requiescit, at aethere stat mens. 2. Adversa fortis constans, spectata secunda Mens in fortuna calIem patefecit Olympo, Consiliis nitens altis patiensque malorum, Spes miseris Latii popuIis, lux unica maestis Clementisque animi summum decus ac pietatis Fons latus, miseris spes grandis et inclita rebus, Armorum magnis pacisque ornata triumphis, In cunctos lenis, fuit amplis aemula rebus Estensis quondam Nicolai gloria, cuius Terras magna colit, superum mens inclita regnum, Optima quae terris virtutum exempla reliquit, Privatis calcar, regis monimenta per omnes. 3. Conditus hoc recubat Nicolaus marchio saxo, Gloria per latias cuius volat inclita terras, Quo nunquam fuerat populis acceptior alter ItaIicis, quo non pietate insignior alter, In quo virtutes cunctae fulsere priorum Praestantes, cuius generosos grandia gesta Nutribant animos nulli virtute secundos. 4. Cognita iam superis magnarum gloria rerum Parta toga atque armis, crudelia vincere fata Non valuere: suis iunxerunt invida regnis Numina, qui latios mulcebat in arma furentes Aspera magnanimo componens pectore bella, Contentusque suis veterum de more manebat Finibus atque almam tranquillo tempore pacem Servabat, populis sancta pietate verendus. Hic Nicolaus erat Estensi marchio, gentis Gloria, qui aetherea meritis iam sede quiescit. 5. Magnanimus cupiens Nicolaus marchio gestis Quaerere per varias decus indelebile terras Fortia vulgavit claris virtutibus acta. Norat magnanimi subiectos more leonis Servare et iustis poenis domitare rebelles. Iustitia insigni meruit caelestia regna, Exemplum latiis regnandi nobile cunctis.