CroALa: documentum

Documentum EUSTACHI.plan-01.xml in db pdill0

---

1. Tarentum Urbs regionis opes prestat miranda Tarentum, Mira magnis meritis, sancte Catalde, tuis; Deliciis vulgata suis fit nota per orbem Bino cincta mari, fertilitatis humus. Emulus hic Rome situs in bellisque notatus, Fertilis urbsque mari diviciosa suo. Vitibus hec variis multis frondescit olivis, Diversis pomis, ficubus atque piris; Pratis et silvis uberrima fert numerosa Hec armenta, greges et genus omne fere. Inde Ceres, bombix, sal, quicquid fertile cultu Terra parit, cunctis deliciosa cibis. Quis numerare queat pisces maris, ostrea, tunnos, Auratas, cephalos, pisces et omne genus? 2. Neapolis Inclita Parthenope, generosa Neapolis, alto Nomen ab Enea que renovata tenes, Culta prius grecis, de nomine Parthenopei Parthenope dicta, regia regis eras; Post pius Eneas urbem renovavit et auxit. 3. de equo neapolitano Hactenus effrenis, nunc freni paret habenis, Rex domat hunc <aequus> parthenopensis equum. 4. hec est coronica dum destructa fuit | civitas potentina Inde potentini populi furor obruit omnes, Qui tulerunt aquile signa verenda sibi. Urbs est Lucanis girata Potentia lucis, Fulta patrociniis, sancte Girarde, tuis, Montibus et pratis. Gregis armentique feraces, Et lini late predita cultat agros, Lonbardis populis austera potensque colonis Prestat vicinis diviciosa suis. Auditis cedum furiis, victore minante, Insanit populus, turbine turba ruit. Iram victoris placet hoc placare furore, Vindictam facere, cedere cede viros. Nec minus inde suis iacuit post diruta muris, Sed punita magi impietate sua. Gullielmus cadit hic et Grassinella propago, Cunque sua sequitur multa ruina domo: Quem terrata vocat cum multis Bartholomaeus Hic capitur, stringunt vincula stripta viros, Captivosque omnes ducunt Acherontis in arcem. Sed dedit alternas sors variata vices: Nam comitiva manus Riccardus Sancta Sofia, Castanee Enricus ac Venusina cohors Eventu miro venerant Acherontis in hostes, Captivosque vident inde venire viros. Protinus agressi ductores marte, subire Discrimen faciunt: hic fugit, ille perit. Cum sociis miles fit liber Bartholomaeus Instantique neci fata dedere moram: Tunc perit ille Petrus Sapiencia Basilicate, Campi maioris gentis iniqua ferens. Proditur, et pretio pretiosi fedus amici Auro fedatur. Fit scelerata fides: Heu quantum scelus est funesta pecunia! Celum Supponunt precio fulva metalla suo. Annis millenis biscentum septuaginta, Franco regnante, Romana sede vacante, Exilii dampnum relevans dictata per annum Explicuit mesta vates per singula gesta. 4a. Nomen Matera genetrix Eustacius, omen Iudicis et scribe Venusiam dedit, Excidium patrie velut alter flet Ieremias, Mundi conflictus Italieque malum. 5. Messana Inque tuo portu messes sibi Roma parabat, Indeque Messana nomina messis habet.