CroALa: documentum

Documentum BLOSIO.appe-01.xml in db pdill0

---

1. Faustus Capiferreus Chisi octogeminis oculis videt atria Ianus Lumina fessa refert non satiata Deus Arescet potius longis meus amnis ab annis Lactea quam Blosi carmina Tybris ait. 2a. Hieronymus Borgia ad Augustinum Chisium Divitiae pariunt aliis, Auguste, nitorem: Tu lumen, magnum divitiisque decus. Nam quod regifico sumptu tam ingentia Romae Tecta novas: Ancos nomina prisca refers; Quod tot praestantes animas tot clara virorum Ingenia hoc aevi fine perire vetas, Optima queque fovens mensis genialibus ultro: Quae iam sint Regum munera vera doces. 2b. idem in palatium eiusdem Stellifero coeli venientem e culmine Romam, Ne divum incuset sedula turba Iovem; Magnanimus vulgo semotam Chisius aulam Condidit hanc Tusco, Tuscus et ipse, solo. Ut Deus ipse polo cum iam descendet ab alto Sese alium in terris iactet habere polum. 2c. idem in idem Barbaricis postquam furiis ruit inclyta Roma, Excessere omnes Urbe cadente Dei. Ast ubi regales Augustus Chisius aedes Condidit, antiquum restituitque decus: Diique Deaeque simul coelo rediere: beatam Unam hanc certantes quisque fovere domum: Denique Liber, Amor, Charites, Venus aurea, Pallas Mutue iurarunt hunc habitare locum. Felix cuius amant Dii tecta, Auguste, volentes: Certatimque homines ore favente colunt. 3. Hieronymus Donatus Felix villula, Chisius Deortun Quam sedem statuit, nec invidere Ipsis nos sinit, atque perbeata Cui totos Heliconis hausit amnes Laudandae Blosius, novosque honores Omnis, quos dedit, obstupescet aetas. Aurum Chisius addit erigitque Moles, sedibus aemulas olympi, Et pictura animum loquente figit: At Cyprim Blosius Cupidinemque Et nymphas, charitasque, Deliumque Cum Musis, genitoque Maia, et ipsum E celo quoque provocat Tonantem, Convivasque facit perenne Chisi. Quisquis viderit audietve sumptum Emirabitur ille purpuramque Auratos quoque regiosque postes. Sed quae machina cunque certat astris Scabro denique conteretur aevo. At qui legerit ista iure seclis Commendata fatebitur futuris, Atque isthaec iterabit usque et usque. Felix villula terque perbeata Cui totos Heliconis hausit amnes Laudandae Blosius, novosque honores Omnis, quos dedit, obstupescet aetas. 4. Antonius Tebaldeus de Leone et Ghisio Dum Leo formosis Ghisi discumberet hortis Iupiter ad superos talia versus ait. Quaenam aequanda illis convivia, vera fateri Si volumus, vile est nectar, et ambrosia. Quos hominum e terris pepulerunt crimina, Ghisi Coelestes revocet mensa beata deos.