CroALa: documentum

Documentum ANDRELIN.eglo-06.xml in db pdill0

---

Francus inaudita dammam polit arte nitentem, Quem ferat ad dominam sorte favente suam. Gallus O quam vana teris poliendo tempora damma, Deliciose puer, nam pectine semper eburno Mansuetos verris clunes et lactea colla, Suspensisque fricas manibus, gremioque tepenti Huius membra foves placido madefacta sopore. Instruis ut miti porrecta cibaria dente Carpat, et ad nutus celeri pede currat eriles Admotasque manus lambat; cervice nitenti Aurea dat crepitus dependens bulla sonoros Caelatamque gerens molli sub imagine nympham. Munditiis innata viget; per vulnera mille Oppeteret potius, maculis quam sordeat atris. Frivolus hic labor est; viridi dum gramine gutta Matutina nitet, fecunda in pascua, France, Duc avidas potius pecudes comitesque Molossos. Fructiferis operanda modis studiosa iuventa est Sedulitate mera, senio ne, France, trementi Heu sis vicini vanus spectator acervi. Francus Utile consilium profers, nec sancta recuso Maturi documenta senis, sed, Galle, probandum est Ingenii iuvenilis opus quod mente sagaci Omnia praevideat baculo ventura senili. Gallus Si viget in tenera velox prudentia mente, Cur verbis adversa facis? docilique iuventa Cur tua venturos aetas non respicit annos? An dabit iste tuus tam larga obsonia damma, Ne gregis errandi te cura remordeat ulla? Francus Si labor esset iners, sterili si litus aratum Vomere, si vigilis consumpta impensa lucernae, Esset ovis pascenda mihi; maiora recessu Utiliore feram prima quam commoda fronte. Nec spes fracta cadet, ni mens praesaga bonorum Sit falsa decepta fide votisque sinistris. Gallus Haud motu credenda levi est, nisi causa liquescat Nota prius; dubia dependet sorte futurum. Votis saepe suis et tempore fallitur ipso . Credula mens hominum; sed si fortuna secundet Optatis ventura tuis, gaudere necesse est. Francus Edita nympha lacu cycnos pascente canoros Hic ubi femineum sortita est Mantua nomen Arverno stat iuncta duci, quo bella movente Arma infesta tremunt, domitoque ex hoste triumphat, Qualis Thessalico Caesar memoratur in agro Hostiles superasse manus, vel qualis Achilles Hectore ter rapto caesum fuit ultus amicum. Non ita nix pura est canis quae montibus albet, Haud planta calcata gravi, quam pulchra nitentis Membra deae radiant; clarumque decentia factum Nomina conveniunt sacrato imposta lavacro. Cornigeros alii cervos capreasque fugaces Auritosque ferunt lepores ursosque feroces, Ast ego dona fero roseae quae congrua nymphae Mansuetaeque reor; damma non tersius ipso Mitius aut animal, nec forma venustior exstat. Gallus Forsitan haec eadem curas ridebit inanes, France, tuas, moto nec cardine firma patebit Ianua pulsanti, neglectaque dona iacebunt. Francus Scilicet hoc tali natum est ex arbore germen Quae lassum dulci venientem amplectitur umbra, Nec mundi pars ulla iacet qua mitior arbor Fructificet; nostro iam nota est illa palato, Dum vesana fames bilem stimularet acutam. Gallus Omnia ieiuno sapiunt vel pessima ventri. Saepe bibi crassam caenosi fluminis undam Aestibus in mediis; sitienti molle Falernum Illa mihi visa est, grato vel suavia gustu Massica, civili pressus vel clade Lyaeus. Francus Dulcior haec nympha est illa quam daedala cera Mellificavit apis; tali pro nectare linquam Caelestem ambrosiam sacrum quae spirat odorem. Interea coctum ferventi sinciput olla Atque unctos lardo caules comedamus opimo. Ecce vocat tardos mensa nos, Galle, parata Docta saporiferas Phyllis condire popinas.