CroALa: documentum

Documentum ANDRELIN.carm-01.xml in db pdill0

---

1. ad sanctum Rochum ut urbem Parisiensem | a pestilentia tueatur Non ita predator ruit hostica miles in arva, Ut ruit in nostrum pestis acerba caput. Ac veluti subito deiecte turbine frondes, Saucia letali vulnere turba cadit. Nullus Paeoniis aeger relevatur ab herbis Facta Machaonia cura ne<c> arte iuvat. Ulcera quis sanet divino immissa furore? Non facit ad nostras plaga superna manus. Tu potes optatam solus prebere medaelam Et, pie, succensum flectere, Rocche, Deum. Presidiine clausa tui sit ianua queso, Sed misero pandas limina tota choro. Namque solet pietas populum miserata iacentem Excipere ac tepido quenque fovere sinu. Caerea sanatis ponetur imago cathernis Assiduasque ferent in tua templa preces. Quaelibet ignare pandenda est gratia genti, Debet et auctori vita recepta suo. 2. de immaturo reverendissimi domini legati obitu | hexasticon Hic defuncte iaces, deflet quem tota, Georgi, Gallia, tam magno tristis et orba patre. Invida Mors tantum fausto decus abstulit orbi. Heu! longa est summis vita negata viris. Gloria sed vivit, nullum moritura per aevum: Indomita virtus inclita morte caret. 3. eiusdem de eodem tetrastichon Illustris Gallo nituit qui splendor in orbe, Hic habet Ambosius corpora functa pater. Si tanto non seva viro Libitina pepercit, Quid speret sacri cetera turba chori? 4. de eodem Pastor eram, eheu, populi pater, aurea sese Lilia subdebant, quercus et ipsa michi. Mortuus en iaceo, morte extinguuntur honores, At virtus mortis nescia morte viret.